Policajske wustawki Zarjadniskeho zwjazka "Při Klóšterskej wodźe" jako městnopolicajski zarjad za gmejny Chrósćicy, Njebjelćicy, Pančicy-Kukow, Worklecy a Ralbicy-Róžant přećiwo wobswětoškódnemu zadźerženju a wobćeženju z haru, za škit přećiwo zjawnemu wobškodźenju kaž tež k připrawjenju domowych čisłow.

Na zakładźe §9 wotst. 1 w zwisku z § 1 wotst. 1 a § 17 wotst. 1 Policajskeho zakonja Swobodneho stata Sakskeje (SaksPolZ) we wuhotowanju wozjewjenja z dnja 13.08.1999 (SächsGVBI. str. 466) je zwjazkowa zhromadźizna Zarjadniskeho zwjazka "Při Klóšterskej wodźe" za teritorij sobustawskich gmejnow Chrósćicy, Njebjelčicy, Pančicy-Kukow, Worklecy a Ralbicy-Róžant sćěhowace policajske wustawki wobzamknyła.

§ 1 Wobłuk płaćiwosće / definicija zapřijećow

(1) Wobłuk płaćiwosće policajskich wustawkow je wšón teritorij sobustawskich gmejnow Zarjadniskeho zwjazka "Při Klóšterskej wodźe".

(2) Městny policajski zarjad je po § 64 Sakskeho policajskeho zakonja (SaksPolZ) wšón teritorij sobustawskich gmejnow Zarjadniskeho zwjazka "Při Klóšterskej wodźe".

(3) Zjawne dróhi su dróhi, puće a naměstna, kotrež słuža zjawnemu wobchadej resp. na kotrychž so woprawdźe zjawny wobchad wotměwa, z jich wobstatkami (jězdne puće, puće za pěškow a kolesowarjow, pobočne, dźělenske a wěstotne smuhi, přirowy, skłoniny, podpěrne murje a zelenišća).

(4) Puće za pěškow su za zjawne wužiwanje pěškow postajene abo dispoziciji stejace płoniny, njehladajo na jich staw wutwarjenja. Njejsu-li tajke puće, płaća jako tajke pobočne kromy jězdneje w šěrokosći 1,5 metra. Jako puće za pěškow płaća tež wšě za pěškow myslene wosebite puće; wosebje cony za pěškow, wobchadnozměrowane wobłuki w zmysle §42 wotst. 4a StVO a schody.

(5) Zelenišća a wočerstwjenišća su powšitkownje přistupne, připrawjene wobłuki, kotrež słuža k wočerstwjenju ludnosće abo porjenšenju wobraza wjeski abo krajiny. K tomu słušeja na přikład tež wobchadne zelenišća, powšitkownje přistupne hrajkanišća a sportnišća, tereny kupjelow, studnjow a pohrjebnišćow.

§ 2 Wobćeženje z haru

(1) Za škit powšitkownosće je zakazane, ćěrić haru, kotraž druhich jara myli. Měrkažaceje hary ma so generelnje wzdać mjez 22:00 a 6:00 hodźinami, wosebje po wopušćenju zawjeselenjow abo korčmow.

(2) Akustiske aparaty a hudźbne instrumenty smědźa so jenož tak wužiwać, zo druhich njepřicpěwajomnje njemyla. To płaći wosebje při wotewrjenych woknach a durjach, na balkonach a wonka. To njepłaći při ćahach, demonstracijach, wikach a hermankach pod hołym njebjom, při zarjadowanjach, kotrež tradicionalnym wašnjam wotpowěduja a za hamtsce dowolene wozjewjenja.

(3) Ze zhromadźernjow wosrjedź bydlenskich štwórćow abo w bliskosći bydlenjow njesmě hara wuchadźeć, kotraž druhich njepřicpěwajomnje myli. Wokna a durje maja być zawrjene, je-li to trjeba.

(4) Dźěła w domjacnosći a w zahrodźe, kotrež měr kaža, smědźa so dźěłowy dźen jenož wot 7:00 do 12:00 hodźin a 14:00 do 20:00 hodźin a sobotu jenož wot 7:00 do 12:00 hodźin a wot 14:00 do 19:00 hodźin přewjesć. Na njedźelach a swjatych dnjach njejsu tajke dźěła dowolene.
Do tajkich dźěłow słušeja wosebje wužiwanje motorowych zemjuwobdźěłacych mašinow a trawusyćawow kaž tež klepanje, rězanje z piłu, točenje, škrabanje a drjeworubanje, wuklepowanje přestrjencow, łožow, matracow atd., kaž tež mjetanje blešow a materialijow do za to na zjawnych městnach stejacych containerow.

(5) Skót, předewšěm psy, ma so tak dźeržeć, zo ze swojimi njepřestajnymi skótnymi hłosami nikoho bóle hač je to pod datymi móžnosćami přicpějomne, njemyli.

(6) Zo by so hara a wupuch jězdźidłow wobmjezował, je wosebje we wobydlenych kónčinach a tež zwonka zjawnych dróhow zakazane, motoram njetrjebawši běžeć dać, njetrjebawši wótře w dworowych zachodach, na nutřkownych dworach atd. startować, durje njetrjebawši wótře a často praskać, při na- a wotkładowanju njetrjebawšu haru ćěrić.

§ 3 Porjad, wěstota a čistota zjawnych dróhow a zahrodnišćow

(1) Zjawne dróhi njesmědźa so bóle hač njewobendźomnje zanjerodźić. Winik ma sam zanjerodźenje hnydom wotstronić. Nječini-li wón to sam, ma kóšty za to njesć. Z polow abo twarnišćow so wróćace jězdźidła maja so do wužiwanja zjawnych dróhow wurjedźić!

(2) Na zjawnych terenach stejace containery smědźa so jenož za postajene zaměry wužiwać. Je zakazane, wotpadki, materialije abo druhe předmjety na containery abo pódla nich stajeć.

(3) Prečmjetanje drobnych wotpadkow (nopaški, tyzy, wuprózdnjenje popjelnikow atd.) na zjawnych dróhach abo w přirodźe je zakazane. To płaći tež za wšo wotkładowanje, kotrež so płaćacemu prawu přećiwja.
Nastajene papjerniki smědźa so jenož za drobne wotpadki wužiwać a nic za domjace abo rjemjeslniske.

(4) We wobłuku zjawnych dróhow a zelenišćow njeje dowolene, lěhać abo nocować, agresiwnje prošerić, cholowy wobroćeć a druhich z haru, z wobćežowanjom, pjanosću abo pod drogami mylić.

(5) Wšitcy wobydlerjo podłu zjawnych dróhow a zelenišćow maja we wobłuku swojich winowatosćow na to dźiwać, zo je na přimjezowacym wotrězku dróhi wšo w tajkim stawje, zo wosobam a wěcam strachi njehroža.
Nastupa to wosebje zawěsćenje pinčnych woknješkow, zadźěłanje z třěchi padacych předmjetow (kaž třěšne cyhele) abo njeporjadne wobhrodźenje (na přikład z płota hladace kónčki hozdźi, hawzy) kaž tež zadźěłanje haćadłam na chódniku.
Nastate škody resp. žórła strachow, kotrež wobydler podłu dróhi sam zamołwić nima abo wotstronić njemóže, maja so hnydom městnej policiji přizjewić.

§ 4 Dźerženje skotu

(1) Skót ma so tak dźeržeć abo dohladować, zo njejsu ludźi a skoćata wobćežene abo wohrožene a zo so wěcne hódnoty njewobškodźa.

(2) Psy njesmědźa bjez přewoda a zwonka widźenja wosoby, kotraž móže wołajo na skoćo skutkować, swobodnje wokoło běhać. We wsy maja so psy generelnje na powjazu wodźić. Při zeskupjenju ludźi a w kónčinach, kotrež su z wotpowědnymi taflemi woznamjenjene, maja so psy na powjazu wjesć. Kusace psy maja k tomu přidatnje měć pranc, kotryž ma kusanju zadźěłać. Na zjawne dźěćace hrajkanišća a sportnišća psy njesmědźa.

(3) Wobsedźer abo wodźer psa ma so wo to starać, zo skoćo swoje hromadki na zjawne abo cuze ležomnosće njekładźe. A tola tam načinjene psyče howna maja so hnydom wotstronić, a to do domjacnosće dźeržerja psa.

§ 5 Njedowolene přičinjenje plakatow, wopisanje, pomolowanje

(1) Přičinjenje plakatow, pismow abo pomolowanjow, kotrež nimaja ani přizjewjenje, wuchwalowanje, pokiw na rjemjesło abo powołanje za wobsah, je na městnach w zmysle § 1 wotst. 3 do 5 zakazane. Tónle zakaz njepłaći za přičinjenje na za to předwidźanych městnach (na přikład plakatowe stołpy, wabjenske tafle, wozjewjenske tafle) resp. za wosebje tomu připrawjene płoniny.

(2) Policajski zarjad smě dopušćić wuwzaća wot w wotst. 1 rjadowaneho zakaza, hdyž njeje přećiwjenja k zjawnym zajimam a wosebje njeje stracha, zo so wjesny abo nadróžny napohlad abo wěstota a njepoćežowanje nadróžneho wobchada wohrožuja.

(3) Předpisy Sakskeho twarskeho porjada, porjada za nadróžny wobchad, kaž tež prawa priwatnikow na jich wobsydstwje, so tutych postajenjow njedótkaja.

§ 6 Chodojtypalenje a lěhwowe wohenje

(1) Chodojtypalenje dnja 30. apryla kóždeho lěta kaž tež lěhwowe wohenje dyrbja być dowolene. Próstwu ma zapodać zamołwity podawajo čas, městno a wulkosć planowaneho wohenja, a to najpozdźišo 14 dnjow do toho městnemu policajskemu zarjadej. Dowolnosć móže być wjazana na wuměnjenja.

(2) Za chodojtypalenje a lěhwowe wohenje smědźa so jenož materialije wužiwać, w kotrychž njejsu jědojte maćizny abo kotrež při palenju jěd njeprodukuja (njezarodźene abo njebarbjene drjewo, wobrězki štomow abo kerkow).
Zadźěłać ma so sylnemu rozwalenju kura.

§ 7 Přičinjenje domowych čisłow

Wobsydnicy domow maja najpozdźišo na dnju zaćehnjenja do domu přičinić wot gmejny domej přirjadowane domowe čisło, w arabskich cyfrach a małopisanych pismikach. Domowe čisła maja być wot dróhi, do kotrejež dom słuša, derje čitajomne. Při domach, kotrež dale wot dróhow steja, móže so čisło při zachodźe do ležownosće přičinić.

§ 8 Dowolenje wuwzaćow

Městny policajski zarjad móže wuwzaća předpisow tohole policajskeho postajenja dowolić,

1. hdyž nastanje za potrjechenych njepřicpějomna ćeža a žane zjawne zajimy přećiwo tomu njesteja,
2. hdyž je to w zjawnym zajimje.

§ 9 Přendźenja přećiwo porjadej

(1) Přendźe so přećiwo porjadej w zmysle § 17 wotst. 1 SaksPolZ, štóž zaměrnje abo lochkomyslnje:

1. přećiwo § 2 wotst. 1 nócny měr kazy,
2. přećiwo § 2 wotst. 2 akustiske aparaty a hudźbne instrumenty tak wužiwa, zo so druzy njepřicpějomnje poćežuja,
3. přećiwo § 2 wotst. 3 we zhromadźernjach haru zawinuje, kotraž druhich zwonka njepřicpějomnje myli,
4. přećiwo § 2 wotst. 4 přewjedźe měrkažace domjace abo zahrodniske dźěła w postajenych měrowych časach,
5. přećiwo § 2 wotst. 5 skót tak dźerži, zo so druze njepřicpějomnje poćežuja,
6. přećiwo § 2 wotst. 6 druhich z njetrjebawšej haru abo wupuchom jězdźidłow poćežuje,
7. přećiwo § 3 wotst. 2 wužiwa containery přećiwo postajenym zaměram abo pódla nich předmjety wotstaja,
8. přećiwo § 3 wotst. 3 drobne wotpadki na zjawne dróhi abo do přirody mjeta a papjerniki znjewužiwa,
9. přećiwo § 3 wotst. 4 na zjawnych terenach lěha nocuje, agresiwnje prošeri, cholowy wobroća, druhich poćežuje abo haći,
10. přećiwo § 3 wotst. 5 žórła strachow na zjawnej dróze přiwobroćenej stronje ležownosće abo twarjenja hnydom njewotstroni,
11. přećiwo § 4 wotst. 1 skót tak dźerži a dohladuje, zo so druzy wohrožuja abo poćežuja,
12. přećiwo § 4 wotst. 2 psam wokoło běhać da, w skupinach ludźi abo woznamjenjenych conach přiwjazane nima, kusatym psam bjez pranca běhać da a psam přistup k zjawnym dźěćacym hrajkanišćam a sportnišćam njezadźěła,
13. přećiwo § 4 wotst. 3 psyče howna w zjawnosći hnydom porjadnje njezrumuje,
14. přećiwo § 5 wotst. 1 plakaty přičinja a za to njedopušćene městna wopisuje abo pomoluje,
15. přećiwo § 6 wotst. 2 materialije pali, w kotrychž su jědy abo při palenju nastawace jědy abo z načinjenym sylnym kurom ludźi poćežuje,
16. přećiwo § 7 při domje abo zachodźe do ležownosće derje čitajomne domowe čisła njepřičini.

(2) Wotst. 1 njepłaći, dalokož je dowolene wuwzaće po § 10.

(3) Přendźenja přećiwo porjadej móžeja so po § 17 wotst. 2 SaksPolZ a § 17 wotst.1 a 2 Zakonja wo přendźenjach přećiwo porjadej z pjenježnej pokutu znajmjenša 5,00 eurow a najwyše 1.000,00 eurow, při lochkomyslnym jednanju přećiwo tomu z 500,00 eurami pochłostać.

§ 10 Poměr druhim předpisam

Tónle policajski porjad njedótka so předpisow zwjazkowych a krajnych zakonjow a dalšich hižo wobstejacych postajenjow. To płaći wosebje za předpisy Sakskeho policajskeho zakonja, Zwjazkoweho zakonja za škit před emisijemi, Wotpadkoweho zakonja, Sakskeho zakonja wo njedźelach a swjatych dnjach, Prěnjeho zakonja k wotpadkowemu hospodarstwu a k škitej pódy w Swobodnym staće Sakska, Sakskeho dróhoweho zakonja, Zakonja wo wotstronjenju mortwych skoćatow kaž tež Postajenjow wo harje trawusyčadłow a wo harje na sportnišćach a hrajnišćach, Policajskeho postajenja Sakskeho ministerstwa za socialne, strowotu a swójbu k škitej před strašnymi psami, Postajenja wo strašnych maćiznach a rjadowanja nastupajo nócneho časa w § 25 wotst. 4 Sakskeho policajskeho zakonja.

§ 11 Nabyće płaćiwosće

Tute policajske wustawki su płaćiwe z dnjom jich wozjewjenja.

Pokiwy:

Po § 4 wotst. 4 sada 1 Sakskeho gmejnskeho porjada su formalne zmylki we wustawkach lěto po wozjewjenju wustawkow wuhojene.

To njepłaći, hdyž:

1. so wustawki njejsu abo hdyž su so ze zmylkami zhotowili,
2. su so předpisy wo zjawnosći posedźenja, dowolenja abo wozjewjenja wustawkow zranili,
3. je wjesnjanosta po § 52 wotst. 2 Sakskeho gmejnskeho zakonja dla zranjenja zakonjow na wobzamknjenju wustawkow přećiwjenje zapołožił,
4. do wotběha w sadźe 1 mjenowaneho časa:
   1. je prawniski dohlad wobzamknjenje wustawkow porokował abo
   2. je so pisomnje gmejnje, z pomjenowanjom wěcy, zranjenje wobchadźenja abo postajenja formy zdźěliło.

Hdyž je so wuprajiło zranjenje po sadźe 2 čo 2 abo 3, tak móže tež po wotběhu w sadźe 1 mjenowaneho časa kóždyžkuli porokować zranjenje a žadać jeje wotstronjenje. Sady 1 a 3 maja so jenož nałožować, hdyž je so z wozjewjenjom wustawkow na formowe předpisy a prawniske sćěhi pokazało.

Pančicy-Kukow, dnja 28.02 2002

podp. Ryćer
předsyda zwjazka