Předstajenje gmejny Chrósćicy

Gmejna Chrósćicy mjezuje we wuchodźe na wokrjes Budyšin a wupřestrěwa so na cyłkownje 13 qkm. We wjesnych dźělach Chrósćicy, Kozarcy, Hórki, Kopšin, Nuknicy a Prawoćicy bydla dohromady 1.130 wobydlerjow.

Wjace hač 90 % wobydlerjow su Serbja. Žiwje so we wšědnym žiwjenju, w pěstowarni a w šuli serbska rěč pěstuje. Na wosebitych swjedźenjach wuhladaš mnoho holcy a žony w serbskich narodnych drastach. Někotre starše žony noša hišće dźensa wšědnje narodnu drastu.

Chrósćicy so w lěće 1225 k prěnjemu razej naspomnichu. Něsto pozdźišo załoži so tu prěnja farska wosada wokoliny. K wosadźe słušaca barokowa farska cyrkej "Swj. Symana a Judy" bu w 2. połojcy 18. lětstotka natwarjena. Na pódlanskej farskej łuce dotwari so w lěće 2002 serbska starownja.

Wobydlerjam a towarstwam steji w Chrósćicach dobra infrastruktura k dispoziciji. Tak móže so nimo sportnišća, někotrych nakupowanišćow, běrowa čestnohamtskeho wjesnanosty, dweju hosćencow a lěkarskich praksow tež moderna Wjacezaměrowa hala z 500 městnami wužiwać. Dwulětnje wotměła so na burskich dworach Chrósćic woblubowany Mjezynarodny folklorny festiwal.

Na kromje Chrósćic namakaš pomnik za padnjenych pólskich wojakow 2. swětoweje wójny. Wjesny dźěl Hórkow běše w zańdźenosći wobdaty wot wjacorych skałow. Zwostali su šěsć jězorow. Najwjetši z wodowej płoninu 3,7 ha. W nim je woda 35 m hłuboka. Tuta něhdyša skała so wot nurjakow wužiwa.

Gmejna Chrósćicy leži wosrjedź płódnych zahonow. Wjacore ratarske zawody tute hospodarske móžnosće wužija.

Žórło: Zarjadniski zwjazk "Při Klóšterskej wodźe", "Wužitne informacije za wobydlerjow a hosći", 2003