Gmejna Njebjelčicy mjezuje w zapadźe na wokrjesne město Kamjenc. We wjesnych dźělach Njebjelčicy, Wěteńca, Miłoćicy, Pěskecy a Serbske Pazlicy bydla na cyłkownje 22,9 qkm 1.180 wobydlerjow. Někak dwě třećinje wobydlerjow su Serbja.

Njebjelčicy so ze załoženjom klóštra Marijina hwězda 1248 k prěnjemu razej naspomnichu. Přez bliskosć ke klóštrej nastachu wuske politiske a hospodarske poćahi. Jenož w Pěskecach eksitowaše ryćerkubło, kiž w běhu stawiznow wjacore razy wobsydźerja měnješe. Jako "hród" mjenowane ryćerkubło liči dźensa k wosebitosćam gmejny.

Dalše wosebitosće gmejny su w lěće 1743 natwarjena barokowa farska cyrkej "Swj. Měrćina" w Njebjelčicach, wjesna kapałka w Pěskecach, Miłočanska žaba a spjaty jězor blisko Njebjelčic, kotryž přičahuje mnohich wudźerjow.

W zašłosći wobstejachu wjesne zhromadźenstwa přewažnje z burow a chěžkarjow, kiž sej na polach, we wokolnych cyhelnicach, skałach abo w šamotowni swój wšědny chlěb zasłužachu. Dźensa namakaja wobydlerjo wosebje we wokolnych předewzaćach a w bliskim wokrjesnym měsće Kamjenc dźěło.

Při S100 (Kamjenc-Budyšin) leži přemysłowa přestrjeń Njebjelčicy. Dojězdna dróha S102 je Njebjelčansku gmejnu na awtodróhu A13 (Drježdźany-Berlin) a A4 (Budyšin-Drježdźany) přiwjazała.

W Miłoćicach namakaš sydła Křesćansko-socialneho kubłanskeho skutka z.t. a Sakskeho krajneho kuratorija z.t. Wot politiskeho přewróta sem angažujetej so wobě towarstwje w Kamjenskim wokrjesu a přez wokrjesne hranicy na socialnym a hospodarskim polu.

Gmejna Njebjelčicy wudźeržuje wuske partnerske styki ke komunam wšelakich krajow. K rjapej partnerstwow a gmejnskeho žiwjenja słušeja wosebje towarstwa. Wosebje znata je gmejna přez Mjezynarodny gmejnski swjedźeń.

Mnozy angažuja so wo kulturelne, ekologiske, hospodarske a infrastrukturelne wuwiće gmejny. K spěchowarjam wuwića tradicionelneho serbskeho sydlenskeho ruma słušeja na jednej stronje wobydlerjo Njebjelčanskeje gmejny sami a na druhej stronje wosobiny a institucije druhich kónčinow Němskeje a Europy. Wuraz tutych prócowanjow su nam spožčene wuznamjenjenja.

• 2008 - Europske myto za ponowjenje wjeski 2008
• 2007 - Sakske krajne wubědźowanje - twarjenje na kraju 2007
• 2006 - dobyćer 6. krajneho wubědźowanja "Rjeńša naša wjes - naša wjes ma přichod"
• 2005 - dobyćer we wubědźowanju "Rěčam přichilena gmejna"
• 2005 - dobyćer 6. krajneho wubědźowanja "Rjeńša naša wjes - naša wjes ma přichod" (wobwod Drježdźany)
• 2004 - 2. městno při 6. krajnym wubědźowanju "Rjeńša naša wjes - naša wjes ma přichod (wokrjes Kamjenc)